पर्वतको कुश्मा नगरपालिका ७ का जनप्रतिनिधीले पाँच वर्षको अवधिमा गरेका कार्यहरुको सूचिसहित श्वेतपत्र जारी गरेका छन् । २०७४ सालको स्थानीय तहको निर्वाचनबाट विजयी भएका वडाअध्यक्ष सुवासचन्द्र पौडेलले आफ्नो कार्यकालमा गरेका कामहरुको बारेमा श्वेतपत्र सार्वजनिक गर्नुभएको हो । पाँच वर्षको कार्यकालमा भएका कामहरुको बारेमा वडाअध्यक्ष सुवासचन्द्र पौडेलले पत्रकार सम्मेलन गर्दै जानकारी दिनुभयो ।
पौडेलले २९ वटा बुँदामा आफुहरुले गरेका कामहरुको सूचि सार्वजनिक गर्नुभएको छ । पूर्वाधार विकास, शिक्षा, स्वास्थ्य, कृषि, पशुपालन, पर्यटन, खेलकुद तथा आर्थिक एवं सामाजिक विकासका विभिन्न कार्यहरु वडाले सम्पादन गरेको पौडेलले जानकारी दिनुभयो । पाँच वर्षको अवधिमा वडा भवन बनाउन जग्गा व्यवस्थापन भएको, जेष्ठ नागरिक भवन, लिफटीङ खानेपानी, गोदामचौर खेल मैदान, सयलघारी र समाजघर देखि सार्वजनिक व्यायम केन्द्र तथा क्रियाघर निर्माण गरिएको उल्लेख छ । वडा क्षेत्रमा चार लेन तथा दुई लेनको पक्कि सडक बनेको कुरा पनि उपलब्धीमा समेटिएको छ ।
मठमन्दिरको संरक्षण, कृषिमा आकर्षण बढेको, कृषि तथा पशुपालनमा रोजगारी सृजना, खरेहामा आधारभूत स्वास्थ्य केन्द्र निर्माण, नगर पोर्टल, छाडा तथा अनुत्पादक पशुका लागि कुश्मा गौशाला, रुप फेरिएको खरेहा धारा, सामुदायिक होमस्टे भवन , नर्सरी केन्द्र, सहनशीलता सहकारी ,शिक्षामा गुणस्तरसँग जोडिएर गरिएको सुधारका थुप्रै प्रयासहरु लगायतका विगतका उपलब्धिहरु श्वेत पत्रमा उल्लेख गरिएको छ । उहाँले श्वेतपत्रमा सबै कुरा समेटिएको हुनाले यसैलाई आधार मानेर वडावासीहरुले आफुहरुलाई फेरि पनि नेतृत्वमा जान आग्रह गरेकै कारण शुरु गरेका कार्यहरु सम्पन्न गर्नका लागि जसको सोच उसैको नेतृत्व भएमा मात्रै अधुरा कार्यहरु पुरा हुने भएकाले आफु वडाअध्यक्षको उम्मेद्वार बनेर टिम सहित मैदानमा उत्रिएको उहाँले बताउनुभयो । पाँच बर्षे कार्यकालमा पुर्वाधार, आर्थिक,सामाजिक ,शिक्षा, स्वास्थ्य , कृषि ,पर्यटन, उद्दमशिलता , संस्थागत विकास लगायतलाई प्राथमिकता दिइएको र आगामी कार्यकालमा पनि सोही कुरालाई केन्द्रमा राखेर आफु अगाडि बढेको वडा अध्यक्ष पौडेलले बताउनुभयो । उहाँले वडाबासीहरुलाई पुनः बहुमतका साथ जिताउन आग्रह समेत गर्नुभएको छ ।
