नीजि क्षेत्रको साझेदारी विना पर्यटन प्रबद्र्धन असम्भव : मन्त्री बस्याल

पर्वत, १० चैत
गण्डकी प्रदेश सरकारका उद्योग तथा पर्यटन मन्त्री मित्रलाल बस्यालले नीजि क्षेत्रको साझेदारी विना पर्यटन क्षेत्रको प्रबद्र्धन असम्भब रहेको बताउनुभएको छ । पर्वत उद्योग बाणिज्य संघको ४२ औँ साधारणसभाको उद्घाटनका क्रममा बोल्दै मन्त्री बस्यालले मुलुकमा पर्यटकीय पुर्वाधार निर्माणमा नीजि क्षेत्रहरुले महत्वपूर्ण भूमिका निर्वाह गरेको भन्दै सरकार र नीजि क्षेत्रको साझेदारीबाट नै पर्यटनको विकास हुने बताउनुभयो ।
कार्यक्रममा मन्त्री बस्यालले पर्वतको पर्यटन क्षेत्रलाई जोड्दै जिल्लामा निर्माण भएका पर्यटकीय पुर्वाधारहरुमा नीजि क्षेत्रले ठूलो भूमिका निर्वाह गरेको बताउँदै गण्डकी प्रदेश सरकारले समेत साझेदारीमा पर्यटन क्षेत्रको विकास गर्ने लक्ष्य लिएको बताउनुभयो । ‘पर्वतमा नीजि क्षेत्रले कुनै पनि पर्यटकीय क्षेत्रको विकासका सवालमा अघि बढ्ने योजना बनाउनुभएको छ भने हामीलाई पनि भन्नुहोस् सरकार साझेदार गर्न तयार छ’ उहाँले मुलुक र मुलुकबासीका हितमा हुने सवै खाले गतिविधिमा सरकार र नीजि क्षेत्र एकै साथ अघि बढ्नुपर्ने आसय व्यक्त गर्नुभयो ।
पर्वत उद्योग बाणिज्य संघले आफ्‌नो स्वर्ण बर्षको आरम्भ सँगै उक्त साधारण सभा आयोजना गरेको थियो । कार्यक्रममा नेपाल उद्योग बाणिज्य महासंघका केन्द्रीय सदस्य युवराज राजभण्डारी, नेपाली कांग्रेस पर्वतका सभापति युवराज जोशी, नेकपा एमाले पर्वतका अध्यक्ष गोविन्द पहाडी, नेकपा माओवादीका उमाकान्त भुर्तेल, जिल्ला समन्वय समिति पर्वतका उपप्रमुख सोमबहादुर जिसी, पोखरा उद्योग बाणिज्य संघका अध्यक्ष गोकर्णबहादुर कार्की, पर्वतका पुर्व अध्यक्ष केदारनाथ शर्मा, पत्रकार महासंघ पर्वतका पुर्व अध्यक्ष एवं संघका प्रेस सल्लाहकार सन्तोष थापा र साधारण सदस्यको तर्फबाट कम्प्युटर व्यवसायी किशोर सापकोटाले मन्तव्य व्यक्त गर्नुभएको थियो ।
कार्यक्रममा स्वागत मन्तव्य सँगै संघका अध्यक्ष ठाकुर वि. पौडेलले वर्तमानमा पर्वत उद्योग बाणिज्य संघको अवस्था र आगामी तीन बर्ष सम्म गरिने विविध गतिविधि तथा कार्ययोजनाको विषयमा बताउनुभएको थियो । उहाँले बर्ष २०८२ लाई स्वर्ण जयन्ती बर्षका रुपमा मनाउने बताउँदै जिल्लाको पर्यटन प्रवद्र्धन गर्न “जाउँ है पर्वत” भन्ने अभियान संचालन गर्ने र पर्वत जिल्लाको पहिचान झल्किने स्वर्णस्तभ निर्माण गर्ने , व्यवसायीहरुको सुरक्षाका लागि सामुहिक दुर्घटना विमा कार्यक्रम संचालन गर्ने, जिल्ला स्थित सरकारी तथा गैह्रसरकारी संघ,संस्था कार्यालयहरुलाई आबश्यक पर्ने सामानहरु स्थानिय बजारबाट नै खरिद गराउन पैरवी गर्ने लगायतका विषयबस्तुहरु प्रष्टाउनुभएको थियो । कार्यक्रमको सञ्चालन महासचिव खड्गप्रसाद खनालले गर्नुभएको थियो । साथै कार्यक्रममा काेषाध्यक्ष शैलेन्द्र कर्माचार्यले अार्थिक प्रतिबेदन पेश गर्नुभएकाे थियाे ।