बटारे काइलाले आफ्नै घरमा आगो लगाएपछि………

पर्वत, २८ माघ
गाउँमा दुःख जिलो गरेर खाने बटारे काइला आँसी नाम्लो लिएर श्रीमतीकै सल्लाहमा एकाविहानै जंगल तिर निस्किन्छन् । घर नजिकै जंगलमा घाँस दाउराका लागि जाँदै गर्दा उनले आफ्नो घर जंगलले ढेपेको गम्छन् र आगो लगाएर जंगल नष्ट गर्ने कुचेष्टा रच्छन् । यत्तिकैमा गाउँका एक जना भलाद्मी बटारेसँग बाटोमा भेटिन्छन् र बटारेको जंगलमा आगो लगाउने सोचप्रति उनले अस्वीकार गर्दै यस्तो नगर्न अनुनय गर्छन्् तर बटारे काइलो आफ्नो ढिपी छोड्दैनन् । अन्ततः बटारेकाइलाले जंगलमा घाँस दाउरोको लोभमा आगो लगाउँछन् । त्यही आगो केही बेरमा बटारे काइलाको घर सँगै रहेको उपद्रो बस्तीमा सल्किन थाल्छ । आगो लगाएर बटारे काइला घर नफर्किँदै उनैको घरमा आगो सल्किसकेको हुन्छ । उनी घर आइपुग्दा न घर छ, न त घरमा श्रीमती नै ।
यो काल्पनिक कथा शुक्रबार बडागाउँ खेलमैदानमा भएको पुर्वाभ्यासमा उपद्रो गाउँको कथालाई विषयबस्तु बनाएर शसस्त्र प्रहरीले गरेको आगोलागी रोकथामको पुर्वाभ्यास हो । उक्त प्रदर्शनमा बटारे काइलो नामका व्यक्तिलाई मुख्य पात्र बनाएर गाउँका अन्य व्यक्तिहरुको सुझावलाई नमान्दा नमान्दै खरबारीमा लगाएको आगो बस्तीमा पसेर बटारे काइलाको श्रीमती सहित घर जलेर नष्ट भएको विषयबस्तु उठान गरिएको थियो ।
शसस्त्र प्रहरी बल २५ नं. गण हेडक्वाटर चण्डिका पर्वतको आयोजनामा पर्वतमा आगलागी नियन्त्रणका लागि सुरक्षा निकायको संयुक्त पुर्वाभ्यास कार्यक्रम सञ्चालन भएको थियो । शसस्त्र प्रहरीले नेपाली सेना, नेपाल प्रहरी सहितको सहभागितामा उक्त पुर्वाभ्यास प्रदर्शन गरेको हो ।
शसस्त्र प्रहरीले जनचेतना जगाउने र आगलागीको घटना नियन्त्रणमा सुरक्षाकर्मीहरुको योगदान दर्शाउने उद्देश्य अनुरुप पुर्वाभ्यास गरेको हो । गर्मी मौसम शुरु भए सँगै आगलागीका घटनाहरु घट्न सक्ने अवस्थालाई मध्यनजर गर्दै उक्त पुर्वाभ्यास प्रदर्शन गरिएको शसस्त्र प्रहरीका गणपति अरविन्द श्रेष्ठले जानकारी दिनुभयो । कार्यक्रममा प्रमुख जिल्ला अधिकारी चित्राङगत बरालले सुरक्षा निकायहरुको संयुक्त पुर्वाभ्यास जिल्लाको विपद् व्यवस्थापनका लागि महत्वपूणर् रहेको बताउनुभयो । उहाँले पर्वत जिल्लालाई मानव जन्य विपद्का घटनाबाट मुक्त बनाउन सवै निकायको उत्तिकै भूमिका रहेको बताउनुभयो ।
कार्यक्रममा कुश्मा नगरपालिका अन्तर्गत कुश्मा बजार भित्रका वडाध्यक्ष, जिल्ला प्रहरी कार्यालयका प्रमुख मधुसुदन न्यौपाने, नेपाल पत्रकार महासंघका केन्द्रिय सदस्य छविलाल तिवारी, पत्रकार महासंघ पर्वतका अध्यक्ष सन्तोष थापा, उद्योग वाणिज्य संघका अध्यक्ष गोपी अधिकारी, निवर्तमान अध्यक्ष केदारनाथ शर्मा, नेपाल रेडक्रस सोसाईटीका सभापति रुद्रवहादुर रिमाल लगायतको सहभागिता रहेको थियो । उक्त आगालागी घटना पश्चात् घटनास्थलमा सुरक्षा निकाय, रेडक्रस, सञ्चारकर्मी लगायतको भूमिकालाई समेत दर्साइएको थियो ।