पर्वत, १५ जेठ
पर्वतको कुश्मा नगरपालिकाले नगरका सबै स्वास्थ्य संस्थामा स्वास्थ्य सामाग्री वितरण गरेको छ । नगरका सबै स्वास्थ्य संस्थालाई कोरोना संक्रमण नियन्त्रण र व्यवस्थापनका लागि आवश्यक पर्ने सामाग्री वितरण गरेको जनाईएको छ ।
स्वास्थ्य संस्थामा कोरोना संक्रमणका बिरामीहरु समेत आउने गरेकाले विरामीहरु मार्फत स्वास्थ्यकर्मीलाई सुरक्षित राख्ने र एक व्याक्तिबाट अर्को व्याक्तिमा नसर्न उपयोगी मानिने सामाग्रीहरु नगरले वितरण गरेको हो । नगरप्रमुख रामचन्द्र जोशीले आवश्यकता र मागका आधारमा सामाग्री उपलब्ध गराईएको जानकारी दिए । उनका अनुसार कुश्मा नगरपालिका भित्रका १७ वटा स्वास्थ्य संस्थामा सामाग्रीहरु प्रर्याप्त मात्रामा उपलब्ध गराईएको छ ।
कुश्मामा एक जिल्ला अस्पताल, एक प्राथमिक स्वास्थ्य केन्द्र, नौ वटा स्वास्थ्यचौकी, तीन वटा शहरी स्वास्थ्य केन्द्र, तीन वटा आधारभूत स्वास्थ्य सेवा केन्द्र रहेका छन् । ति स्वास्थ्य संस्थामा पीपीई, अक्सिमीटर, फेस शिल्ड, मास्क, सेनिटाईजर लगायतका सामाग्री स्वास्थ्य शाखा मार्फत वितरण भएका स्वास्थ्य शाखाका प्रमुख उमाकान्त सापकोटाले बताए ।
ठूलीपोखरी प्राथमिक स्वास्थ्य केन्द्रमा औषधीको अभाव रहेको समाचार सञ्चारमाध्यममा प्रकाशित भएपछि त्यहाँ आवश्यक औषधीहरु उपलब्ध गराएको पनि सापकोटाले बताएका छन् । उक्त स्वास्थ्य केन्द्रमा औषधीको अभाव नभएपनि गाउँलेले घरघरै औषधी लगेर स्टक राख्न खोजेकाले स्वास्थ्यचौकीका प्रमुखले नमानेको हुनाले अभाव रहेको अर्थमा बुझ्न आएको पनि स्वास्थ्य शाखाले जनाएको छ । सरकारले दिने निशुल्क औषधीहरु सबै स्वास्थ्यचौकीमा रहेको पनि शाखाले स्पष्ट पारेको छ ।
गतवर्षको कोरोना संक्रमण फैलिएको बखत स्वास्थ्य संस्थामा बुट, थर्मल गन, चश्मा, गाउन , वासेवल पीपीई प्रयाप्त मात्रामा दिएकाले अहिले ति सामाग्रीहरुको अभाव नरहेको स्वास्थ्य शाखाका प्रमुख सापकोटाले जानकारी दिए । सिटामोल, एजिथ्रोमाईसिन, जीवनजल लगायतका औषधीको बजारमा अभाव रहेपनि स्वास्थ्य संस्थामा अभाव नरहेको दाबी गरिएको छ ।
कुश्मा नगरपालिकामा १७८ जनामा नयाँ भेरियण्ट सहितको कोरोना संक्रमण पुष्टि भएको छ । सक्रिय संक्रमित १४१ जना छन् । यो अवधिमा १५ जनाको निधन भएको छ भने ११८ जना निको भएका छन् । अहिले सम्म ७१० जनाको कोरोना परीक्षण भएको नगरले जनाएको छ ।
पत्रकार महासंघलाई सामाग्री वितरण
पर्वतको कुश्मा नगरपालिकाले कोरोना संक्रमणको महामारीमा फ्रण्टलाईनमा काम गर्ने पत्रकारका लागि स्वास्थ्य सामाग्री उपलब्ध गराएको छ । नगरपालिकाको तर्फबाट पर्वतका पत्रकारलाई वितरण गर्न मास्क, सेनिटाईजर, फेस शिल्ड, अक्सिमिटर लगायतका सामाग्री नेपाल पत्रकार महासंघलाई हस्तान्तरण गरिएको हो । कोरोना महामारीमा समाजलाई सूचना दिने पत्रकारहरुको समस्यालाई मध्यनजर गर्दै स्वास्थ्य सामाग्री वितरण गरेको नगरप्रमुख रामचन्द्र जोशीले बताए ।
नगरप्रमुख जोशीले शुक्रवार ति सामाग्री नेपाल पत्रकार महासंघ पर्वतका अध्यक्ष सन्तोष थापालाई हस्तान्तरण गरेका हुन् । नगरपालिकाले जनताको सुरक्षा गर्दै आएको र पत्रकारहरुले खवरदारी गर्दै आएको बताउँदै जोशीले पत्रकारहरुलाई कार्यक्षेत्रमा सुरक्षित राख्न स्वास्थ्य सामाग्री दिईएको बताए । पत्रकार महासंघका अध्यक्ष थापाले नगरपालिका पत्रकारहरुको अभिभावक रहेकाले नगरले गरेको सहयोगका प्रति आभारी रहेको बताए । पत्रकारलाई नगरपालिकाले सेनिटाईजर, मास्क, फेसशिल्ड, अक्सिमिटर दिएको छ । महासंघका अध्यक्ष थापाले सबै पत्रकारलाई पुग्ने गरि सामाग्री वितरण गर्ने जानकारी दिएका छन् ।
